ملايين بالشاشة وعالواقع ماكو شيء.. برامج الاستثمار بالعراق دعم حقيقي لو فقاعات إعلامية؟
برامج الاستثمار مثل "شارك تانك العراق" و"الفرسان" و"الجسر" سوت ضجة كبيرة وطشت بالترند. الناس تباوع بالشاشة تشوف شباب يحكون بثقة عن مشاريع تقنية وتطبيقات فنتك، وأرقام ملايين ومليارات ومستثمرين يتنافسون حتى يشترون أسهم. بس من تخلص الحلقة وتروح تدور على هاي التطبيقات المليارية، تصدمك الحقيقة: لا اكو تطبيق بالمتاجر، ولا اكو موقع، ولا اكو أي أثر برمجي!
الشارع التقني اليوم ديطرح سؤال حقيقي: هاي الأرقام والتقييمات الفلكية منين تجيبوها؟ شلون مشروع فنتك يدعي تحقيق أرباح طائلة وهو أصلاً ما عنده بنية تحتية؟
أوضح مثال هو مشروع "لاكي" اللي أعلن القائمين عليه بالبرنامج عن أرباح سنوية توصل لـ 300 مليون! تروح تدور عليه، تلقى مشروع ما عنده أي تطبيق فعلي، ووجوده الرقمي مجرد صفحة انستغرام يتيَمة بيها 65 متابع بس!
هذا التناقض الصارخ يخلي البرامج ولجان التحكيم على المحك: هل إحنا قدام استثمار حقيقي وبناء بيئة تقنية، لو مجرد "شو" تلفزيوني وسيناريوهات تبيع الوهم للشباب؟
بناء الفنتك بالعراق يحتاج شفافية وشغل برمجي صلب، مو استعراض أرقام وهمية أمام الكاميرات. إذا استمرت السالفة هيج بدون تدقيق مالي وتقني، راح تنعدم ثقة الناس بكل مشروع ناشئ، وتتحول ريادة الأعمال بالعراق من فرصة حقيقية إلى مجرد فقاعة وتطير.