عێراق بەرەو دیناری دیجیتاڵ هەنگاو دەنێت بۆ چارەسەرکردنی قەیرانی سیولە و پەرەپێدانی سیاسەتی دراوی
ڕاوێژکاری سەرۆک وەزیرانی عێراق، مەزهەر محەمەد ساڵح، پشتڕاستی کردەوە کە دیناری دیجیتاڵ پڕۆژەیەکی ستراتیژی و بەڵێندەرە، نەک چارەسەرێکی سەربەخۆ بۆ قەیرانی سیولەی دارایی.
ئەو ڕوونی کردەوە کە دراوی دیجیتاڵی سەروەری بە مانای دروستکردنی دراوێکی نوێ نییە، بەڵکو بریتییە لە دەرکردنی شێوەیەکی دیجیتاڵی دیناری عێراقی کە بتوانرێت بە شێوەی ئەلیکترۆنی لە ڕێگەی جزدانە دیجیتاڵییەکان و هەژمارە بانکییەکانەوە مامەڵەی پێوە بکرێت، لەگەڵ ئەوەی بەهاکەی هاوتای دیناری کاغەزی دەمێنێتەوە.
ساڵح ئاماژەی بەوە کرد کە گرنگی دیناری دیجیتاڵ لە کەمکردنەوەی پشتبەستن بە پارەی نەقدی، کەمکردنەوەی تێچووی چاپکردن و گواستنەوە و پاراستنی پارە، خێراکردنی پرۆسەکانی پارەدان و بەهێزکردنی گشتگیری دارایی دایە، جگە لە کەمکردنەوەی ئابووری ڕێکنەخراو و ئەو دیاردانەی پەیوەندییان پێوە هەیە، وەک خۆدزینەوە لە باج و سپیکردنەوەی پارە.
ڕاوێژکاری سەرۆک وەزیران هۆشداری دا لەوەی نابێت زیاتر لە پێویست پشت بە دیناری دیجیتاڵ ببەسترێت بۆ چارەسەرکردنی قەیرانی سیولە، چونکە ئەم قەیرانە پەیوەندی بە چەند هۆکارێکی بنەڕەتییەوە هەیە، لەوانە پێکهاتەی بودجە، ئاستی خەرجکردن و ڕادەی متمانەی هاووڵاتیان بە بانکەکان.
هەروەها ئاماژەی بەوە کرد کە بانکی ناوەندی عێراق هەنگاوی گرنگی لە بوارى گۆڕانکاری دیجیتاڵدا ناوە، لە ڕێگەی فراوانکردنی سیستەمەکانی پارەدانی ئەلیکترۆنی و جزدانە دیجیتاڵییەکان.
ساڵح جەختی کردەوە کە سەرکەوتنی دەرکردنی دراوێکی دیجیتاڵی سەروەری پێویستی بە تەواوکردنی چوارچێوە یاساییەکان، بەهێزکردنی ئاسایشی سایبەری و دابینکردنی ژێرخانێکی گونجاوی تەکنەلۆژی هەیە.