عێراق پلانی کارێکی هاوبەشی لەگەڵ FATF پەسەند دەکات بۆ بەهێزکردنی دژە پاککردنەوەی پارە و دابینکردنی دارایی بۆ تیرۆریزم
بانکی ناوەندی عێراق ڕایگەیاند پلانی کارێکی هاوبەشی لەگەڵ گرووپی کاری دارایی (FATF) پەسەند کراوە کە ئامانجی بەهێزکردنی سیستەمی دژە پاککردنەوەی پارە (AML) دژە دابینکردنی دارایی بۆ تیرۆریزم (CFT) و بڵاوکردنەوەی چەکەکان هەیە ئەویش دوای کۆبوونەوەی گشتی گرووپەکە لە مانگی حوزەیران/یونیۆی ئەمساڵ
بانکی ناوەندی لە ڕاگەیاندنێکی فەرمیدا وتی ئەم پلانە لە چوارچێوەی هاوکاری نێوان عێراق و FATF و هەروەها گرووپی کاری دارایی بۆ ناوچەی ڕۆژهەڵاتی ناوەڕاست و باکووری ئەفریقا (MENAFATF) دێت بۆ بەردەوامبوون لە پەرەپێدانی چوارچێوەی چاودێری و پابەندبوونی کەرتی دارایی عێراق
ڕاگەیاندنەکە ئاماژەی بەوە دا کە عێراق لە ژمارەیەک لە بابەتە پەیوەندیدارەکان بە دژە پاککردنەوەی پارە و دابینکردنی دارایی بۆ تیرۆریزم پێشکەوتنی بەدەستهێناوە لە دوای بڵاوکردنەوەی ڕاپۆرتی هەڵسەنگاندنی هاوبەش لە ساڵی 2024 لەوانە:
- بەهێزکردنی ڕێوشوێنی چوونە ناو بازاڕ
- پەرەپێدانی ڕێکارەکانی چاودێری لەسەر کەرتە خاوەن مەترسییە بەرزەکان
- باشترکردنی تێگەیشتنی دەسەڵاتدارە پەیوەندیدارەکان لە مەترسییەکانی تاوانە دارایییەکان
پلانی کارە نوێیەکە کۆمەڵێک هەنگاوی نوێ لەخۆدەگرێت لەوانە:
- بەهێزکردنی هەڵسەنگاندنی مەترسی
- ڕێکخستنی دابینکەرانی خزمەتگوزاریی دارایییە ڤیرچواڵییەکان
- بەرزکردنەوەی ئاستی کارامەیی ڕاپۆرتکردنی مامەڵە گومانلێکراوەکان
- پەرەپێدانی ڕێکارەکانی پەیوەست بە سوودمەندی ڕاستەقینە (Beneficial Ownership)
- بەهێزکردنی لێکۆڵینەوەکان لە تاوانەکانی پاککردنەوەی پارە و دابینکردنی دارایی بۆ تیرۆریزم
بانکی ناوەندی جەختی کردەوە کە جێبەجێکردنی پلانەکە بە هاوکاری دەسەڵاتە دادوەرییەکان ئەمنییەکان چاودێرییەکان و دامەزراوە دارایییەکان ئەنجام دەدرێت لە ماوەیەکی دیاریکراودا کە ئامانجی بەهێزکردنی پابەندبوون بە ستانداردە نێودەوڵەتییەکان و پتەوکردنی سیستەمی دارایی عێراقە
هەروەها ڕاگەیاندنەکە ئاماژەی بەوە دا کە عێراق توانیویەتی لە خستنە ناو لیستی ڕەش دوور بکەوێتەوە بە هۆی ئەو چاکسازی و ڕێوشوێنانەی دامەزراوە پەیوەندیدارەکان لە ماوەی چەند ساڵی ڕابردوودا جێبەجێیان کردووە
بانکی ناوەندی ئاماژەی بەوەش دا کە قۆناغی داهاتوو سەرنج دەخاتە سەر تەواوکردنی پێداویستییەکانی پلانی کار و بەردەوامبوون لە پەرەپێدانی سیستەمی پابەندبوون و چاودێریی دارایی
ئەم ڕاگەیاندنە دوای چەند ڕۆژ لە بڕیاری گرووپی کاری دارایی (FATF) هات کە عێراقی خستە ناو وڵاتانی ژێر چاودێریی بەرزکراوەوە لە هەنگاوێکدا کە دەسەڵاتە عێراقییەکان وتیان هاوکاتە لەگەڵ پلانی کارێکی ڕوون بۆ چارەسەرکردنی تێبینییەکان و بەهێزکردنی کاریگەریی سیستەمی دژە پاککردنەوەی پارە و دژە دابینکردنی دارایی بۆ تیرۆریزم