بانکی ناوەندی عێراق مۆڵەتی کۆمپانیای ئەلشەزان بۆ گۆڕینەوەی دراو هەڵدەوەشێنێتەوە
بانکی ناوەندی عێراق ڕایگەیاند کە مۆڵەتی کاری کۆمپانیای ئەلشەزان بۆ گۆڕینەوەی دراوی هەڵوەشاندووەتەوە، دوای ئەوەی کۆمپانیاکە پێچەوانەی ڕێسا و ڕێنماییە ڕێکخەرەکانی کاری کۆمپانیاکانی گۆڕینەوەی دراو و مامەڵەکردن بە دراوی بیانی لە وڵاتدا کردووە.
ئەم هەنگاوە لە چوارچێوەی هەوڵە بەردەوامەکانی بانکی ناوەندی عێراقدایە بۆ توندکردنەوەی چاودێری بەسەر کەرتی گۆڕینەوەی دراو و ڕێکخستنی ئەم کەرتە، بە شێوەیەک کە پابەندبوون بە پێوەرەکانی بەرەنگاربوونەوەی سپیکردنەوەی پارە و پاراستنی جێگیریی بازاڕ مسۆگەر بکات.
لەو چوارچێوەیەدا، بانکی ناوەندی جەخت دەکاتەوە کە بەردەوامبوونی کاری هەر کۆمپانیایەکی گۆڕینەوەی دراو بە پابەندبوونی تەواوی بە ڕێنمایی و یاسا جێبەجێکراوەکانەوە بەستراوەتەوە، هەروەها ئاگاداری مامەڵەکاران دەکاتەوە لە مامەڵەکردن لەگەڵ ئەو لایەنانەی کە مۆڵەتی کارکردنیان هەڵوەشێنراوەتەوە.